په پنجشېر کې د افغان خبریالانو او رسنیو د ملاتړ بنسټ له امنیتي مسوولینو سره لیدنه وکړه

د افغان خبریالانو او رسنیو د ملاتړ بنسټ (AJMSO) د پلازمېنې زون استازي محمد نذیر دانش په پنجشېر ولایت کې د دغه ولایت د امنیه قوماندانۍ د امنیت له آمر مولوي اول حق‌پرست سره د رسنیزو فعالیتونو د پیاوړتیا او د رسنیو، خبریالانو او سیمه‌ییزو مسوولینو ترمنځ د لا همغږۍ د رامنځته کولو په موخه لیدنه وکړه.

په دې لیدنه کې محمد نذیر دانش رسنۍ د ټولنې له مهمو بنسټونو څخه وبللې او د خبریالانو او اړوندو مسوولینو ترمنځ یې د لا زیاتې همکارۍ او همغږۍ پر پیاوړتیا ټینګار وکړ. نوموړي د پنجشېر ولایت د خبریالانو او رسنیو وضعیت، ستونزې او د رسنیزې ټولنې غوښتنې، په ځانګړي ډول اطلاعاتو ته پر وخت لاسرسی او د خبریالانو د فزیکي خوندیتوب په برخه کې د امنیتي ادارو همکاري، د پنجشېر د امنیه قوماندانۍ د امنیت له آمر سره شریکې کړې.

د پنجشېر د امنیه قوماندانۍ د امنیت آمر مولوي اول حق‌پرست د اولس د پوهاوي او په ټولنه کې د روڼتیا د رامنځته کولو په برخه کې د رسنیو رول مهم او اغېزناک وباله. نوموړي ډاډ ورکړ چې امنیتي مسوولین به د رسنیو او خبریالانو د کاري وضعیت د ښه والي او له هغوی سره د لا زیاتې همکارۍ لپاره له هېڅ ډول هڅو ډډه ونه کړي.

د افغان خبریالانو او رسنیو د ملاتړ بنسټ هڅه کوي چې په ټول هېواد کې د خبریالانو او اړوندو مسوولینو ترمنځ لا زیاته او اغېزناکه همغږي رامنځته شي، څو خبریالان او رسنۍ وکولای شي په خوندي او ډاډمن چاپېریال کې خپلو مسلکي فعالیتونو ته دوام ورکړي.