د فبرورې د ۱۳ مې د راډیو نړیوالې ورځې په مناسبت د افغان خبریالانو او رسنیو د ملاتړ بنسټ (AJMSO) اعلامیه 

د راډیو نړیوالې ورځې په مناسبت چې هر کال د فبرورۍ په ۱۳مه نېټه نمانځل کېږي، د افغان خبریالانو او رسنیو د ملاتړ بنسټ (AJMSO) دغه ورځ د ټولو خبریالانو، رسنیزو کارکوونکو، ویاندویانو، تخنیکرانو او د راډیو درنو اورېدونکو ته د زړه له کومې مبارکي وایي.

راډیو د تر ټولو لاسرسي وړ او اغېزناکو رسنیو له ډلې څخه ده، چې د خبر رسونې، عامه پوهاوي، ټولنیز یووالي پیاوړتیا او د یو بل منلو کلتور د ودې په برخه کې بنسټیز رول لري. په سختو حالاتو او کړکېچونو کې، راډیو تل د خلکو غږ پاتې شوې او د بېلابېلو ټولنو ترمنځ یې د باور وړ پُل په توګه خدمت کړی دی.

‏AJMSO باور لري چې د خپلواکو رسنیو ملاتړ او معلوماتو ته د ټولو لاسرسی، د دوامدار پرمختګ او یوې باخبره ټولنې له اساساتو څخه دي. موږ له ټولو اړوندو ادارو غواړو چې د خبریالانو د ملاتړ او د هغوی د کاري خوندیتوب د تأمین لپاره عملي او اغېزناک ګامونه پورته کړي.

ددغې نیکمرغې ورځې په مناسبت، یو ځل بیا د رسنیو د مسئولانه او ژمن فعالیت څخه د ملاتړ برخه کې خپله ژمنتیا تازه کوو او د راډیو د ډګر د ټولو کارکوونکو له نه ستړې کېدونکو هڅو څخه مننه کوو.

په درنښت
د افغان خبریالانو او رسنیو د ملاتړ بنسټ (AJMSO)
د فبرورۍ ۱۳مه